| |
| دوشنبه 28 آذر ماه سال 1384 |
| بیرلشمیش میللتلر۳۵ میلیون آذربایجانلینین حاقلارینی گورمدی!!! |
| بیرلشمیش میللتلر ایرانی اینسان حاقلارینا قارشی اولدوغونا گؤره محکوم ائلدی. آنجاق تاسسوف له آذربایجان تورکلرین حاقلاریندان هئچ بیر سؤز کئچمدی !!? بو گؤستریر کی بیز 35 میلیون بیر میللت اولاراق نئچه میلیونلوق عربلر و کوردلر قدرده باشارا بیلممیشیک دونیادا وه حتتی منجه ایرانین ایچینده ده اؤز ازیلمیش حاقلاریمیزی دوغرو آچیقلایاق. آمما بونو بیلملیییک کی بو وضعیییت بیزیم گلجییمیزه چوخ منفی اثرلری اولا بیلر و بیز بو وضعیییتی دییشملیییک. اگر ایندییجک بیزیم بیر عمومی مئدیامیز یوخویدو, آمما ایندی گوناز تونین بیر بؤیوک مسولیییتی وار و گرک بیزیم بو دالا قالدیغیمیزی تئزلیکله هامیمیزین ال اله وئرمییمیزله بیر یئنی وضعیییته کی بیزی ایراندا میللی حاقلارین مودافیسینده باشچی کیمی یئرلشدیرسین, دییشدیرک. بو یولدا بیز گرک بیر بؤیوک چالیشیقا باشلایاق. دونیا بؤلگسینده گرک بئله بیر خبرلره بیر ایجتیماعی حرکتلرله او جوملدن “اونین” و “جانادا” دؤولتینین ائلچیلیکلرینین قاباغینا ییغیشما و تومارلار تسلیم ائلمکله اؤز اعتیراضیمیزی بیزیم میللتین حاقلارینین اونودولماسینا گؤسترک. هابئله گلن ایللرده ون و اینسان حاقلاری نگاو لاری سندلرله و اؤز اعتیراضلاریمیزلا مجبور ائدک بیر بؤیوک ظلمه کی بیر بؤیوک میللت حاققیندا ایراندا کئچیر, محکوم ائلسینلر. آیری طرفدن بیز گرک اینتئرناسیونال دیللرده او جوملدن اینگیلیس و فرانسا دیللرینده یاییلان قزئتلرده وه مئدیالاردا تانینمیش بؤیوک عالیملریمیزین اللریله, میثال اوچون در. رضا براهنی کیمی شخصلرله, بو بؤیوک ظلمو دونیایا آچیقلایاق نییه کی بو دونیا دا هر میللتین سسی چوخ مئدیالاردا یاییلسا او قدر باشاریجی اولاجاق. تاسسف له بونو فارسلار کوردلر و ائرمنیلر کی بیزیم بؤیوک دوشمنلریمیز اونلارین ایچیندندی هامیدان یاخشی بیلیرلر و عمل ائدیرلر! گوناز تو آذربایجان و دونیا خبرلرینی هر گئجه ایزلسه و اونلاری بیزیم باخیشیمیزلا تحلیل ائلسه چوخ گؤزل و اثرلی اولا بیلر. منجه تورکساته گیرمکدن سورا, گونده بیر ساعات خبر تحلیل و دیل و تاریخی بیلگیلر فارس دیلینه یاییلماسی بیزیم سؤزلریمیزی بوتون ایرانلیلارا یئتیره بیلر و بو بیزه چوخ اؤنملیدیر. بیز گرک یئنی مئدیالار و خوصوصیله رادیو تیلویزییون لره بؤیوک اهمیییت وئرک و گوناز تو کیمی سییاسی کاناللارین قیراغیندا, فارس لارین هوتبیرده دا گونده آرتان تفریحی-تیجاری کاناللار کیمی اؤز دیلیمیزده تیلویزییونلر یاراداق کی آذربایجان و تورکییه موسیقی و فیلملرینی یایسین. بونلارین بیر نئچسی هوتبیرد دا اولماسی چوخ اؤنملیدیر نییه کی بو ساعات چوخ تاماشاچیسی وار و تا سسف له تورکو کاناللار اوندا چوخ آزدی. اولسون کی بیزیم مئدیالاردا سسیمیز لاپ آزی ساییمیزا قدر یئتیرسین. آیدین تبریزی |
|
